As imaxes que reproducimos nesta publicación poden resultar pouco agradables ou mesmo chegar a ferir algunha sensibilidade.
Pero agardamos que a súa dureza sexa de certa utilidade e que sirva para chamar a atención sobre as consecuencias dun problema do que xa tivemos algún exemplo na comarca nas últimas datas. Falamos do abandono de animais. Ou da despreocupación por eles tras perdelos.
O can do vídeo foi rescatado esta mañá en Rodeiro polo SEPRONA de Lalín despois do aviso dun particular. Foi nun monte no lugar de Borrigueiro, na parroquia da Portela.
Cando os axentes chegaron ao lugar dos feitos atopáronse cun can nun estado gravísimo: enfermo, sucio, ferido, desnutrido… Practicamente á beira da morte.
Non tiña microchip nin ningún outro elemento que o identificase. Pero probablemente levaba moitas semanas sufrindo unhas condicións terribles e lamentables.
O can foi finalmente trasladado polo servizo de recollida de animais abandonados da Deputación de Pontevedra ao seu centro de acollida e protección de Meis, onde se fará o posible por darlle a atención axeitada.
En definitiva: un exemplo das duras consecuencias que pode ter o abandono de animais e que agardemos que sirva para espertar conciencias.
