Logo de varios intentos de negociación para que Ambulancias Quiroga cumprira os acordos asinados coa entrada en vigor do concurso do transporte sanitario urxente dependente do 061, os traballadores e traballadoras de Lalín retoman as mobilizacións e anuncian unha nova manifestación. Afirman “estar fartos das mentiras e das voltas do empresario con tal de non cumprir os acordos”.
Denuncian varias situacións que consideran graves e das que responsabilizan a Ambulancias Quiroga, adxudicataria do servizo. Segundo Pablo Taboada, delegado de persoal da CIG: “desde que se fixeron cargo do servizo a ambulancia de Lalín está nunha situación de absoluta precariedade de medios que non só afecta ás condicións laborais senón tamén ao servizo que prestamos”.
Denuncian o incumprimento dos acordos, vixentes xa desde anterior contrata e que “Ambulancias Quiroga a pesar de asinar os acordos, leva dous anos sen cumprilos aducindo que os seus socios da UTE o enganaron e que a concesión non lle dá, algo que consideramos inecaptable”, di Taboada. Pola falta de persoal hai traballadores/as eventuais que realizan quendas de traballo de até 48 horas seguidas ou máis, sen o descanso obrigatorio, e superando nalgún caso as 300 horas mensuais.
Afirman que a pesar de que o convenio establece claramente o día de cobro, o retraso é sistemático no abono das nóminas ao que se suma o impago da paga de regularización ou a terceira paga extraordinaria aos traballadores eventuais.
Ademais non todos os traballadores e traballadoras dispoñen de uniformidade propia, sendo a solución da empresa que a compartan, cando segundo a normativa vixente en materia de saúde laboral, están consideradas EPIs, polo tanto está prohibido o uso compartido. A empresa impide ademais a estas mesmas traballadoras e traballadores a enviar a roupa á lavandería para a sua correcta desinfección. O resto do persoal, despois de dous anos da adxudicación do sevizo á citada empresa, tampouco contan coa uniformidade completa que recollen o pregos do concurso e que son diferentes da do concurso anterior.
A empresa non realiza a limpeza do centro de traballo desde que se fixo cargo do sevizo, non dispoñendo dun lugar axeitado para levar a cabo tarefas de desinfección do vehículo sanitario, tendo que facelo en vía pública independentemente da climatoloxía e da presenza de viandantes.
Denuncian que a precariadade na que desenvolven o seu traballo é tal que a ambulancia de Soporte Vital Básico non dispón de sistema de telepeaxe, o que obriga, aínda tratándose dunha urxencia vital, a parar na cabina de pago manual da autoestrada para dar os datos de facturación, chegando en ocasións a estar á espera para ser atendidos máis de cinco minutos. Feito do que está informada a fundación 061, e que ata o momento ignorou.
Ao 061 tamén lle solicitan a comprobación de que a ambulancia de apoio cumpra como mínimo co 75% dos servizos nos que se requira, como estipula os pregos do concurso. Coñecido é que isto se incumpre posto que a empresa so dispón dun único traballador/a para este servizo o que imposibilita dita cobertura. Ademáis trátase dun vehículo tipo A2, empregado no transporte programado non urxente, e polo tanto, carente dos recursos materiais necesarios, esto engadido a que vai un só técnico imposibilita unha axeitada asistencia nunha emerxencia.
Por todo esto, piden á Fundación 061, dependente do SERGAS e propietaria do servizo, que tome as medidas que sexan precisas para solventar estas deficiencias, que en último e máis importante termo, poden supoñer algunhas delas un risco vital para os veciños da comarca. Mentras tanto os traballadores e traballadoras retomarán as mobilizacións e anuncian unha manifestación o próximo día 8 ás 11:30h en Chantada.